Хабидом продолжува да расте
Друштвото за управување со станбени згради Хабидом, основано од Хабитат Македонија, достигна 5000 станови под договор за континуирано управување.
Хабидом ДООЕЛ, компанија за управување со станбени згради основана од Хабитат Македонија и лиценцирана од Регулаторната комисија за домување во 2015 година, ја надмина бројката од 5000 опслужени домаќинства. На крајот на 2023 година Хабидом имаше 216 станбени згради со 5172 станови под договор за управување, лоцирани во 8 различни општини во главниот град Скопје и неговата непосредна околина: Карпош (59 згради), Аеродром (48 згради), Центар (36 згради) , Ѓорче Петров (25 згради), Чаир (19 згради), Кисела Вода (18 згради), Сопиште (6 згради) и Гази Баба (5 згради).
Главен приоритет на компанијата за управување со станбени згради Хабидом е обезбедување квалитетни услуги за станбените згради, засновани на иновативен пристап и високо ниво на посветеност. Покрај редовното одржување, ова вклучува постојана комуникација и соработка со секој сопственик, континуирани теренски посети и идентификација на проблемите, како и зајакнување на капацитетите во спроведувањето на мерките за енергетска ефикасност. Понатаму, управуваните станбени згради имаат можност за поволни финансиски аранжмани за редовно и инвестициско одржување.
Паралелно со својот примарен домен на работа, Хабидом успешно го заврши и своето учество како партнер во конзорциумот што го спроведуваше проектот финансиран од програмата Хоризонт 2020 на Европската Унија, насловен како Прилагодени мерки за поддршка на енергетски ранливи домаќинства. Конзорциумот беше предводен од Универзитетот во Корк, Ирска, а вклучуваше партнери од 12 европски земји. Учеството на Хабидом вклучуваше инсталација на опрема за енергетска ефикасност во 600 домови, проследено со анализа на однесувањето и следење на потрошувачката на енергија на опслужените домаќинства.
Повеќе за Хабидом
