Нов проект

Истражување за УНЦХР за условите на домување на 185 семејства

Канцеларијата на високиот комесаријат за бегалци на Обединетите нации (УНЦХР) и Хабитат Македонија воспоставија соработка со цел да им помогнат на 185 семејства со поранешен статус на бегалци да ги подобрат своите услови за живот. Во проектот се вклучени и семејствата кои имаат член со статус на бегалец.

Истражувањето за УНЦХР е со фокус на семејствата кои живеат во Македонија, а се дојдени од Косово за време на кризата во 1999 година. Повеќето бегалци се ромски семејства населени во скопската општина Шуто Оризари.

Во првата фаза на проектот се изготвува анализа на условите за домување на 185 семејства вклучувајќи идентификација на потребите, категоризација и развој на модели за поддршка кои ќе овозможат различна помош за подобрување на условите за домување, како и технички совети за едноставни, пристојни и достапни домови, правни совети и обуки за финансиска писменост, одржување на домот и набавки на материјали за градба. Подобрувањето на условите за домување треба да им обезбеди поголема економска независност и полесна интеграција во општеството на семејствата со поранешен статус на бегалци.