Градење домови во време на пандемија: Амбасадорката на САД волонтираше во Велес
Во услови на суспендирана програма за меѓународно волонтирање по појавата на корона вирусот, посветеноста на борбата против ефектите на пандемијата преку помош на оние кои имаат потреба од нов дом беше демонстрирана на вистински начин од Амбасадорката на САД во Северна Македонија, Кејт Мари Брнс. Во средината на август 2020 година таа го посети Проектот за новоградби во Велес.
Откако заради пандемијата градежните работи на шестата зграда со 12 станови беа ставени во мирување на почетокот на март 2020, волонтирањето на амбасадорката всушност означи обновување на активностите и продолжување со градбата. Претходните години, во рамките на овој проект, веќе се изградени 5 станбени згради со 36 станови.
На симболичното поставување цигли во шестата зграда, под строги Ковид-19 протоколи, се придружи Драган Малиновски, претседател на Управниот одбор на Хабитат Македонија. Приликата беше искористена и за презентација на другите програми на организацијата, за што се погрижија националниот директор Зоран Костов и заменик директорката за програма Лилјана Алчева.
Проектот за новоградби во Велес е дел од традиционалната програма на Habitat for Humanity која обезбедува домови за семејства со ниски приходи. Од започнувањето на проектот во 2008 година на ова градилиште имаат волонтирано повеќе од 1720 меѓународни волонтери организирани во 122 тимови.
