Одлични резултати на Фондот за подобар дом
Заклучно со декември 2006 gодина, по 18 месеци спроведување, иновативната микрофинансиска програма на Хабитат Македонија одобри 98 заеми за реконструкција на субстандардни домови, во вкупен износ од 446,810 американски долари. Тие резултираа со 60 завршени реконструкции, додека 38 реконструкции се во тек.
На почетокот на 2005 година Хабитат Македонија и Можности, локален имплементирачки партнер на глобалната микрофинансиска коалиција Opportunity International, иницираа партнерство преку иновативна програма. Тоа е прво партнерство од овој вид во регионот на Европа и централна Азија.
Со почетокот на фискалната 2006 година (јули 2006) партнерите воспоставија кредитна линија која обезбедува мали заеми (2.400-5000 долари во денарска противредност) за реконструкција и реновирање на субстандарни домови. Кредитната линија произлегува од Фондот за подобар дом, формиран со заеднички финансиски придонес на Хабитат Македонија и Можности. Според проекциите, 5 години по воспоставувањето фондот треба да располага со 1,5 милиони долари, од кои 500.000 на Хабитат и 1 милион на Можности.
Општа цел на ваквиот пристап е справување со сиромашното домување во Македонија во обем поголем од обемот на традиционалната Хабитат програма, во смисла на број на поддржани семејства. Попрецизно, по 18 месеци имплементација на програмата беа одобрени 98 заеми, во вкупен износ од 446.810 долари. Тие резултираа со 60 завршени реконструкции, додека 38 реконструкции се во тек.
Програмата исто така обезбедува нефинансиски услуги, во форма на совети и обука за корисниците на заемите. Со оглед дека процесирањето на заемите е одговорност на микрофинансискиот партнер, овие нефинансиски услуги се нарекуваат Хабитат компонента.
Овој бизнис модел има и неколку други компоненти по кои се разаликува од традиционалната Хабитат програма: побрз обрт на фондовите, гарантирана исплата на заемите и воспоставената умерена каматна стапка која е проектирана да биде повисока од стапката на инфлација. Овие компоненти предвидуваат генерирање приходи неопходни да се покријат оперативните трошоци, правејќи ја на тој начин програмата долгорочно самоодржлива.
